கவிதை விளையாட்டு: தலைப்பை விட்டு செல்

[Madhurangi]

கட்டற்றப் பெருங்காற்று நம்மைக் கடக்கையில்,
வளைவதும் பணிவதும் கோழைத்தனம் அல்ல;
தக்கன பிழைத்தலின் சூத்திரம் என உலகிற்கு உணர்த்தும்
நெடிய பசுமை நிறப் புத்தன் - மூங்கில்!

அடுத்த தலைப்பு : கனவு

[Ninja]

கட்டற்ற கடலும் இல்லை,
கவ்வி செல்ல மீனும் இல்லை;
குத்தும் குளிரில்
எதிர் திசையில் நடந்த
பென்குயினுக்கு
கனவில் இருந்ததெல்லாம்
ஏதுமற்ற
பனி அடர்ந்த அந்த மலைகள் தான்
தன்னை புரிந்து கொள்ளும் வீடு போல


அடுத்த தலைப்பு : தனிமை

[Cholan]

முதல் நண்பனும் அவனே
கடைசி நண்பனும் அவனே
சோகத்திலும் அவனே
சந்தோஷ கண்ணீரும் அவனே
யோசிப்பதும் அவனே
வழிகாட்டியும் அவனே
உறங்கவைப்பதும் அவனே
அவனே என் இனிய தனிமையே



அடுத்த தலைப்பு : தமிழ்

[Madhurangi]

காலத்தின் சுவடுகளில் மூத்தவள் நீ
இன்று கணிப்பொறித் திரையிலும் பூத்தவள் நீ!
முடிவிலியிலும் இளமை மாறா என் அன்னை..
எம் அறிவியலை ஆளும் நவீன விந்தை..
என் தமிழ் தாயே!

அடுத்து : தாய்

[joker]

உயிர் கொடுத்தவள்
நமக்கும் சேர்த்து சுவாசித்தவள்
கருப்பையில் மட்டுமல்ல
கல்லறைக்கு செல்லும் வரை
நமக்காக சுவாசிப்பவள்
தாய்


அடுத்து : ---நிழல்--

[Alsa]

நினைத்திருக்கவில்லை
இறந்த காலத்தில்
இத்தனை ரம்மியம்
இருந்திருக்குமென்று
கடந்த நாட்களெல்லாம்
வெறும் நினைவுகளாய்
போய்விடுமென்றும்



பிடித்து போனதாய்
எல்லோரையும்
மனதினில் விதைக்காதீர்கள்
பின்னொரு நாளில் சிலர்
முட்களாகவும் குத்துவார்கள்

[Jithika]

சொன்னாலும் கேட்காமல்
கொன்றாலும் தோற்காமல்
அடம்பிடிக்கின்ற இதயத்திற்கு
என்றும் உன்நிழலே தஞ்சம்...!!!

🌹கண்கள்🌹

[Thenmozhi]

பேசாமல் பேசும் மொழி  !
புரியாமல் புரிய வைக்கும் மந்திரம் !
ஒரு பார்வையில் பாசம் விதைத்து,
மறு பார்வையில் காதல் மலரச் செய்யும்!

இதயம் மறைக்கும் ஆயிரம் உணர்வுகளை,
இமை அசைவில் சொல்லிவிடும் அதிசயம் !
உலகம் முழுதும் அழகைத் தேடினாலும்,
உண்மையான அழகு தங்குவது
அன்பு நிறைந்த கண்களில்தான் !

அடுத்து ....அழகு

[Baaski]

விண்ணுக்கு வான வில் அழகு
மண்ணுக்கு இயற்கை வளம் அழகு
செடிகளுக்கு பூக்கள் அழகு
கடலுக்கு அலைகள் அழகு
காதலுக்கு அன்பு அழகு
முகத்திற்கு புன்னகை அழகு
உனக்கு நான் அழகு
எனக்கு நீ அழகு

‌அடுத்து   🪷 புன்னகை 🪷