தக்காளி ஊறுகாய்
தேவையானவை: செம்பழமாக உள்ள தக்காளித் துண்டுகள் - 2 கப், (தக்காளியை கழுவி துடைக்கவும்), புளி - நெல்லிக்காய் அளவு, மிளகாய்த்தூள் - 4 முதல் 6 டேபிள்ஸ்பூன், கடுகு - ஒரு டீஸ்பூன், எண்ணெய், உப்பு - தேவையான அளவு.
செய்முறை: ஒரு ஜாடியில் தக்காளித் துண்டுகள், மிளகாய்த்தூள், புளி, உப்பு எல்லாவற்றையும் கலந்து ஒரு நாள் முழுவதும் ஊற விடவும். மறுநாள், அதையெல்லாம் தண்ணீர் விடாமல் மிக்ஸியில் விழுதாக அரைத்துக் கொள்ளவும். கடாயில் எண்ணெய் விட்டு காய்ந்ததும், கடுகு தாளித்து, அரைத்த விழுதைக் கொட்டி, சுருள கிளறவும்.
இதையே மாதக்கணக்கில் கெடாமல் இருக்கும் வகையில் தயாரிப்பதற்கான செய்முறை:
ஊறிய தக்காளித் துண்டுகளை மட்டும் எடுத்து வெயிலில் காய வைத்து, திரும்பவும் சாறில் வைத்து இப்படி 2,3 நாட்கள் காய வைக்கவும். மிக்ஸியில் அரைத்து எடுக்கவும். கடாயில் எண்ணெய் விட்டு, காய்ந்ததும் கடுகு தாளித்து, அரைத்த விழுதைக் கொட்டி சுருள கிளறவும். இது மாதக்கணக்கிலும் கெடாமல் இருக்கும்.
ரொட்டி, சப்பாத்திக்கு தொட்டுச் சாப்பிடலாம். சாதத்துடன் பிசைந்தும் சாப்பிடலாம்
