~ 30 வகை அவல் சமையல்! ~

[MysteRy]

அவல் – கல்கண்டு பொங்கல்



தேவையானவை:

 அவல் – 2 கப், கல்கண்டு – ஒரு கப், முந்திரி – ஒரு டேபிள்ஸ்பூன், நெய் – 6 டீஸ்பூன், ஏலக்காய்த்தூள் – அரை டீஸ்பூன்,

செய்முறை:

 அவல், முந்திரியை 2 டீஸ்பூன் நெய் விட்டு பொன்னிறமாக வறுக்கவும். அவலுடன் சிறிது தண்ணீர் சேர்த்து வேக விடவும். கல்-கண்டை பெரிய ரவையாக பொடித்து, வெந்த அவலுடன் சேர்க்கவும். மீதியுள்ள நெய்யையும் சேர்த்து, ஏலக்காய்த்தூள், முந்திரி சேர்த்து கிளறி இறக்கவும்.

[MysteRy]

அவல் கேசரி



தேவையானவை:

அவல் – 2 கப், சர்க்கரை – ஒரு கப், கேசரி பவுடர் – 2 சிட்டிகை, முந்திரி – ஒரு டேபிள்ஸ்பூன், நெய் – அரை கப், ஏலக்காய்த்தூள் – அரை டீஸ்பூன்.

செய்முறை:

 அவல், முந்திரியை 2 டீஸ்பூன் நெய் விட்டு பொன்னிறமாக வறுக்கவும். முக்கால் டம்ளர் தண்ணீரில் கேசரி பவுடரை கரைத்து, அதில் அவலை சேர்த்து வேக விடவும். வெந்து கெட்டியானதும் சர்க்கரை, மீதமுள்ள நெய் சேர்த்துக் கிளறவும். கேசரி பதம் வந்ததும் ஏலக்காய்த்தூள், வறுத்த முந்திரி சேர்த்தால் ‘கமகம’ அவல் கேசரி ரெடி!

[MysteRy]

அவல் லட்டு



தேவையானவை:

அவல் – 3 கப், சர்க்கரை – ஒரு கப், முந்திரி, திராட்சை – ஒரு கைப்பிடி, ஏலக்காய்த்தூள் – அரை டீஸ்பூன், நெய் – முக்கால் கப்.

செய்முறை:

 கடாயில் ஒரு டீஸ்பூன் நெய் விட்டு முந்திரி, திராட்சையை வறுக்கவும். ஒரு டீஸ்பூன் நெய்யில் அவலை பொன்னிறமாக வறுக்கவும். வறுத்த அவலுடன் சர்க்கரை சேர்த்து மிக்ஸியில் நைஸாக அரைத்துக் கொள்ளவும்.
இதில் முந்திரி, திராட்சை, ஏலக்காய்த்தூள் சேர்க்கவும். மீதமுள்ள நெய்யை சூடாக்கி இந்தக் கலவையில் சேர்த்துக் கிளறி உருண்டைகளாகப் பிடிக்கவும்.

[MysteRy]

அவல் மோர்க்கூழ்



தேவையானவை:

அவல் – 2 கப், லேசாக புளித்த கெட்டி மோர் – ஒரு கப், பச்சைமிளகாய் – 4, கடுகு – ஒரு டீஸ்பூன், பெருங்காயத்தூள் – அரை டீஸ்பூன், எண்ணெய் – 6 டீஸ்பூன், உப்பு – தேவையான அளவு.

செய்முறை:

 அவலை நன்றாக கழுவி, தண்ணீரை வடிக்கவும். அவலுடன் மோர் மற்றும் பச்சைமிளகாயைச் சேர்த்து அரைத்துக் கொள்ளவும். கடாயில் கடுகு தாளித்து, அரைத்து வைத்துள்ள மாவை ஊற்றி, (மாவு தோசைமாவு பதத்தில் இருக்க வேண்டும்) உப்பு, பெருங்காயத்தூள் சேர்த்துக் கிளறவும். கலவை கெட்டியாகும்வரை அடிக்கடி கிளறவும். கூழ் ஒட்டாமல் வந்ததும் சிறிது எண்ணெய் தடவிய தட்டில் கொட்டவும். ஆறியதும் துண்டுகள் போடவும்.

[MysteRy]

அவல் பாயசம்



தேவையானவை:

அவல் – ஒரு கப், சர்க்கரை – முக்கால் கப், பால் – அரை கப், முந்திரி – ஒரு டேபிள் ஸ்பூன், ஏலக்காய்த்தூள் – அரை டீஸ்பூன்.

செய்முறை:

 அவல், முந்திரியை நெய்யில் பொன்னிறமாக வறுத்துக் கொள்ளவும். வறுத்த அவலை சிறிது தண்ணீர் சேர்த்து வேகவிடவும். வெந்ததும் அதனுடன் பால் சேர்த்து ஐந்து நிமிடம் கொதிக்க விடவும். ஆறியதும் சர்க்கரை, ஏலக்காய்த்தூள், வறுத்த முந்திரி சேர்க்கவும். சுவை மிகுந்த இந்தப் பாயசத்தை நிமிடங்களில் செய்து விடலாம். அபாரமாக இருக்கும்.

[MysteRy]

அவல் புட்டு



தேவையானவை:

 அவல் – ஒரு கப், பொடித்த வெல்லம் – கால் கப், தேங்காய் துருவல் – 2 டீஸ்பூன், ஏலக்காய்த்தூள் – கால் டீஸ்பூன், நெய் – 2 டீஸ்பூன்.

செய்முறை:

 அவலை நெய் விட்டு சிவக்க வறுத்து, மிக்ஸியில் கரகரப்பாக பொடிக்கவும். பிறகு அதனுடன் தேங்காய் துருவல், வெல்லப்பொடி, ஏலக்காய்த்தூள் சேர்த்து மீண்டும் ஒருமுறை சுற்றி எடுக்கவும்.
இது புட்டு போன்று பொலபொலவென்று இருக்கும். விருப்பப்பட்டால் பாதாம், முந்திரி சேர்த்தும் பரிமாறலாம்.

[MysteRy]

அவல் – தேங்காய்ப்பால் பாயசம்



தேவையானவை:

அவல் – ஒரு கப், தேங்காய் – ஒன்று, வெல்லம் – முக்கால் கப், முந்திரி – ஒரு டேபிள்ஸ்பூன், ஏலக்காய்த் தூள் – ஒரு டீஸ்பூன்.

செய்முறை:

 அவல், முந்திரியை நெய் விட்டு பொன்னிறமாக வறுக்கவும். தேங்காயைத் துருவி இரண்டு விதமாக பால் எடுக்கவும். அவலை, இரண்டாவதாக எடுத்த தேங்காய்ப்பாலில் சேர்த்து வேக விடவும்.
அவல் வெந்ததும் முதல் தேங்காய்ப்பால் சேர்த்து ஐந்து நிமிடம் கொதிக்க விடவும். பிறகு இறக்கி ஏலக்காய்த்தூள், முந்திரி சேர்க்கவும்.

[MysteRy]

அவல் உப்புமா



தேவையானவை:

அவல் – 2 கப், வெங்காயம் – 3, பச்சை மிளகாய் – 4, எண்ணெய் – 4 டீஸ்பூன், கறிவேப்பிலை, கொத்தமல்லி – ஒரு கைப்பிடி, மஞ்சள்தூள் – அரை டீஸ்பூன், எலுமிச்சம்பழம் – அரை மூடி, கடுகு – ஒரு டீஸ்பூன், உப்பு – தேவையான அளவு.

செய்முறை:

 அவலை நன்றாக கழுவி, தண்ணீரை வடித்து விடவும். வெங்காயம், பச்சைமிளகாயை பொடியாக நறுக்கிக் கொள்ளவும். கடாயில் எண்ணெய் விட்டு, கடுகு தாளித்து வெங்காயம், பச்சைமிளகாய், மஞ்சள்தூள் சேர்த்து வதக்கவும்.
பிறகு, அதில் ஊறிய அவலை உதிர்த்து சேர்த்து, உப்பு, கறிவேப்பிலை, கொத்தமல்லி சேர்த்து நன்றாக வதக்கி இறக்கவும். பரிமாறும்போது எலுமிச்சை சாறு சேர்க்கவும்.

[MysteRy]

அவல் பொரி உருண்டை



தேவையானவை:

அவல் பொரி – 3 கப், வெல்லத்தூள் – ஒரு கப், முந்திரி – ஒரு டேபிள்ஸ்பூன், நெய் – 4 டீஸ்பூன், ஏலக்காய்த்தூள் – ஒரு டீஸ்பூன், சுக்குத்தூள் – ஒரு டீஸ்பூன், வேர்க்கடலை, பொட்டுக்கடலை – தலா ஒரு கைப்பிடி.

செய்முறை:

 முந்திரி, அவல் பொரியை நெய் விட்டு பொன்னிறமாக வறுக்கவும். வெல்லத்தூளுடன் ஏலக்காய்த்தூள், சுக்குத்தூள் சேர்த்து சிறிது தண்ணீர் விட்டு பாகு பதத்தில் காய்ச்சவும். வேர்க்கடலையை வறுத்து தோல் நீக்கி, அதனுடன் பொட்டுக் கடலை, அவல் பொரியைக் கலக்கவும். அவல் பொரி கலவையை பாகில் கொட்டிக் கிளறி, உருண்டை பிடிக்கவும். மாலை நேரத்துக்கேற்ற மொறு மொறுப்பான ஸ்நாக்ஸ் இது!

[MysteRy]

அவல் – வெஜ் உப்புமா



தேவையானவை:

அவல் – 2 கப், கேரட், உருளைக்கிழங்கு – தலா 1, பச்சைபட்டாணி – ஒரு கைப்பிடி, பச்சைமிளகாய் – 4, கடுகு – ஒரு டீஸ்பூன், கடலைப்பருப்பு, உளுத்தம்பருப்பு – 2 டீஸ்பூன், எண்ணெய் – 5 டீஸ்பூன், இஞ்சி – ஒரு சிறிய துண்டு, கறிவேப்பிலை – அரை கப், உப்பு – தேவையான அளவு.

செய்முறை:

 அவலை நன்றாக கழுவி, தண்ணீரை வடித்து விடவும். காய்கறிகளை பொடியாக நறுக்கிக் கொள்ளவும். இஞ்சி, பச்சைமிளகாயை நறுக்கி, காய்களுடன் சேர்க்கவும்.
கடாயில் எண்ணெய் ஊற்றி, கடுகு, பருப்பு வகைகளை தாளித்து, காய்கறிகள், பட்டாணி, இஞ்சி, பச்சைமிளகாய், கறிவேப்பிலை சேர்த்து வதக்கி, உப்பு சேர்க்கவும். காய்கள் வதங்கியதும் ஊறிய அவலை சேர்த்து, இரண்டு நிமிடம் வதக்கி இறக்கவும். மணத்தில் மட்டுமல்ல.. சுவையிலும் அசத்தும் இந்த உப்புமா!

[MysteRy]

அவல் – வெஜ் பிரியாணி



தேவையானவை:

அவல் – 2 கப், உருளைக்கிழங்கு, பெரிய வெங்காயம், கேரட், பீட்ரூட் – தலா 1, காலிஃப்ளவர் – ஒரு கைப்பிடி, பச்சைமிளகாய் – 4, இஞ்சி – ஒரு சிறு துண்டு, பூண்டு – 5 பல், சோம்பு, கசகசா – ஒரு டீஸ்பூன், பட்டை – சிறிய துண்டு, எண்ணெய் – 6 டீஸ்பூன்.

செய்முறை:

 தோல் நீக்க வேண்டியவற்றை நீக்கி, காய்களை மெல்லிய நீள துண்டுகளாக நறுக்கவும். அவலை தண்ணீரில் கழுவி, நீரை வடித்து விடவும். இஞ்சி, பூண்டை விழுதாக அரைத்துக் கொள்ளவும்.
கடாயில் எண்ணெய் காய்ந்ததும் சோம்பு, கசகசா தாளித்து பட்டை, இஞ்சி – பூண்டு விழுதை சேர்த்து வதக்கவும். பிறகு காய்கறிகள், கீறிய பச்சைமிளகாய், உப்பு சேர்த்து, சிறிது தண்ணீர் தெளித்து வதக்கவும்.
காய்கள் வெந்ததும் அவலை உதிர்த்து சேர்த்து, ஒரு நிமிடம் வதக்கி இறக்கவும். விரும்பினால் பிரெட் துண்டுகளை எண்ணெயில் பொரித்தும் இதனுடன் சேர்க்கலாம்.

[MysteRy]

அவல் பொங்கல்



தேவையானவை:

அவல், பயத்தம்பருப்பு – தலா ஒரு கப், மிளகு – ஒன்றரை டீஸ்பூன், சீரகம் – அரை டீஸ்பூன், முந்திரி – ஒரு டேபிள்ஸ்பூன், பொடியாக நறுக்கிய இஞ்சி – ஒரு டீஸ்பூன், கறிவேப்பிலை – சிறிது, நெய் – அரை கப், பெருங்காயத்தூள் – அரை டீஸ்பூன், உப்பு – தேவையான அளவு.

செய்முறை:

 பயத்தம்பருப்பை வேக விடவும். பருப்பு வெந்ததும் அவலை சேர்க்கவும். இரண்டும் சேர்ந்து கெட்டியானதும் உப்பு, பெருங்காயத்தூள் சேர்த்துக் கிளறி இறக்கவும்.
கடாயில் நெய்யை ஊற்றி மிளகு, சீரகம் தாளித்து, முந்திரி இஞ்சி, கறிவேப்பிலை சேர்த்து, அதை அவல் பொங்கலில் கொட்டிக் கிளறவும். இதைச் செய்வது சுலபம்.. ருசியும் அபாரம்!

[MysteRy]

கறிவேப்பிலை பொடி அவல்



தேவையானவை:

அவல் – 2 கப், கறிவேப்பிலை – 2 கைப்பிடி, உளுத்தம்பருப்பு – ஒரு கைப்பிடி, கடலைப்பருப்பு – 2 கைப்பிடி, மிளகு – 2 டீஸ்பூன், எண்ணெய் – 4 டீஸ்பூன், காய்ந்த மிளகாய் – 5, உப்பு – தேவையான அளவு.

செய்முறை:

 கறிவேப்பிலையை நிழலில் உலர்த்தி, வாணலியில் சிறிது எண்ணெய் விட்டு வறுக்கவும். பருப்பு வகைகள், மிளகு மற்றும் மிளகாயை எண்ணெயில் வறுக்கவும். வறுத்தவற்றை மிக்ஸியில் பொடிக்கவும். சுவைக்கேற்ப உப்பு சேர்த்தால் கறிவேப்பிலை பொடி தயார்!
அவலை கழுவி, நீரை வடித்து ஒரு நிமிடம் ஊற விடவும். வாணலியில் சிறிது எண்ணெய் விட்டு, அவலை சேர்த்து ஒரு நிமிடம் வதக்கவும். இதனுடன் ருசிக்கேற்ப கறிவேப்பிலை பொடி சேர்த்து கிளறி இறக்கவும்.

[MysteRy]

மோர் அவல்



தேவையானவை:

அவல் – 2 கப், கெட்டியான மோர் – முக்கால் கப், பெருங் காயத்தூள் – 2 சிட்டிகை, பச்சைமிளகாய் – 4, கடுகு – ஒரு டீஸ்பூன், உளுத்தம் பருப்பு, கடலைப்-பருப்பு – தலா ஒரு டீஸ்பூன், எண்ணெய் – 2 டீஸ்பூன், கறிவேப்பிலை, கொத்தமல்லி – சிறிதளவு, உப்பு – தேவையான அளவு.

செய்முறை:

அவலை கழுவி, தண்ணீரை வடித்து, கெட்டி மோரில் உப்பு சேர்த்து ஊற வைக்கவும். ஐந்து நிமிடம் ஊறினால் போதும். கடாயில் எண்ணெய் விட்டு கடுகு, பருப்பு வகைகளை தாளித்து, அதில் பச்சைமிளகாயை போடவும். ஊற வைத்து உதிர்த்த அவல், பெருங்காயத்தூள் சேர்க்கவும். இரண்டு நிமிடம் வதக்கி இறக்கவும். கறிவேப்பிலை, கொத்தமல்லி சேர்த்து பரிமாறவும்.

[MysteRy]

புதினா பொடி அவல்



தேவையானவை:

அவல் – 2 கப், புதினா – ஒரு கட்டு, (இலைகளை மட்டும் ஆய்ந்து சுத்தம் செய்யவும்), உளுத்தம்பருப்பு, கடலைப்பருப்பு – தலா ஒரு கைப்பிடி, மிளகு, சீரகம் – தலா 2 டீஸ்பூன், எண்ணெய் – 3 டீஸ்பூன், காய்ந்த மிளகாய் – 6, உப்பு – தேவையான அளவு.

செய்முறை:

 புதினாவை நிழலில் உலர்த்தி, கடாயில் ஒரு டீஸ்பூன் எண்ணெய் விட்டு வறுக்கவும். அவலை தவிர மற்ற எல்லாவற்றையும் புதினா வுடன் சேர்த்து, தண்ணீர் விடாமல் அரைக்கவும்.
அவலை கழுவி, தண்ணீரை வடித்து விட்டு ஒரு நிமிடம் ஊற விடவும். கடாயில் 2 டீஸ்பூன் எண்ணெய் விட்டு, அவலை ஒரு நிமிடம் வதக்கி, புதினா பொடியை சேர்த்துக் கிளறி இறக்கவும்.