எனது கிறுக்கல்கள்...,

[PraBa]

கூரையை பிய்த்துக்கொண்டு
கொட்டுமென்று சொன்னவன்
கூரை பிய்ந்து
என் தலையில் விழுமென்பதை
சொல்லவே இல்லை ....

[PraBa]

குரல்வலையில்
கால் வைத்தோர்
கவிதை சொல்கிறாய்
விமர்சிக்க
திராணியில்லை எனக்கு
மிரளுமென்
விழிகளை கருவாக்கி
மீண்டுமோர்
கவிதை சொல்கிறாய்
வலியை அலங்கரிக்கிறது
உன்
வார்த்தைகள் ....
கவிதை கனக்கிறது

[PraBa]

கண்களை விற்றேனும்
ஓவியம் வாங்க போகிறேன்
வரைந்தவன்
பசித்திருக்கிறான்

[PraBa]

நொறுங்கிப்போன கனவுகளை
பொறுக்கிக்கொண்டிருந்தவன்
விழிகளில்
விரிந்து கொண்டிருக்கிறது
அடுத்த கனவு.....!

[PraBa]

வீசியெறியப்படும்
உங்களின்
காலியான மதுப்புட்டிகள்
உடையாமலிருக்குமேயானால்
ஓட்டைக்கோணியில்
அதை சேகரிக்குமவனுக்கு
நீங்கள்
கடவுளாகவும் இருக்கலாம் ....!
கடவுள்
போதையிலிருப்பதாய்
கடைசி வரை
சொல்லிக்கொண்டே இருப்பான்
அவன்....!

[PraBa]

தீர்த்தவன் பெயரும்
தீர்த்துக்கொண்டவன் பெயரும்
பொறிக்கப்பட்டாகிவிட்டது....
பார்த்துக்கொண்டிருக்கிறான்
தன்பெயரை
தாகத்தோடு அவன்....!

[aasaiajiith]

முறையே மூன்றாம்  , நான்காம் மற்றும்  இறுதி பத்தி
மிரண்டுதான் போனேன்  வாசித்து முடித்ததும் !!

அபாரம் !!
நல்ல கற்பனை வளம் !!
தொடர்ந்து எழுதவும்!!

[PraBa]

எழுதியவரையில்
எதுவும் நீயில்லை
என்கையில் தான்
அது
கவிதையானதாய் ஞாபகம் ...!

[PraBa]

அடையாளம் தெரிகிறதா பாருங்கள்
அங்கே
புத்தம் தேடிக்கொண்டிருப்பவன்
புத்தனே தான் ....!

[PraBa]

ஒரு
மழையின் சாரல்
உன்னை
நனைக்க துவங்கியது ...
ஒரு
சாரலின் மழை
என்னை
நனைத்துவிட்டது....!

[PraBa]

இரையாகும்
கரையான்கள்
கால் கடித்தாலும்
வலி தாங்கும்
பறவை.....!

[PraBa]

வாழிடம்
வானமெனில்
நனைவது சாத்தியமில்லை ....

[PraBa]

துரோகியென்று உன்னை
அடையாளப்படுத்துகையில்
நண்பனென்பதையும்
ஞாபகப்படுத்தவேண்டியிருக்கிறது....!

[PraBa]

நிறைவேறாத ஆசைகளோடு
செத்துப்போகிறவன்
ஆவியாகவேனும்
அலைந்துகொண்டிருக்கிறான்
எல்லாம் நிறைவேற்றி சாகிறவன்
என்னவாகிறானென்பது மட்டும் தெரியவில்லை ...!

[PraBa]

குறுக்கும் நெடுக்குமாயிருக்கிற
அந்தக் கோடுகள்
நதிகளென்றே
நம்ப வைக்கப்பட்டிருக்கிறது
தேச வரைபடத்தில்....!