30 வகை ராகி சமையல்!

[kanmani]

ராகி அதிரசம்

தேவையானவை: ராகி மாவு - இரண்டரை கப், உருண்டை வெல்லம் - 2 கப், நெய் - கால் கப், ஏலக்காய்த்தூள் - ஒரு டீஸ்பூன், எண்ணெய் - தேவையான அளவு.

செய்முறை: உருண்டை வெல்லத்தை மெழுகு பதத்தில் பாகு காய்ச்சி ராகி மாவில் ஊற்றி, ஏலக்காய்த்தூள் சேர்த்து கிளறவும். மாவு இளஞ்சூடாக இருக்கும் போது 2 கரண்டி நெய் சேர்த்து கலந்து கொள்ளவும். மாவு ஆறியதும் அதிரசங்களாக தட்டி எண்ணெயில் பொரித்-தெடுக்கவும்.

[kanmani]

ராகி லட்டு

தேவையானவை:

வறுத்த ராகி மாவு - ஒரு கப், சர்க்கரைத்தூள் - ஒண்ணேகால் கப், நெய் - கால் கப்புக்கும் சிறிது குறைவாக, ஏலக்காய்த்தூள் - சிறிதளவு, ஒன்றிரண்டாக பொடித்த முந்திரி - தேவையான அளவு.

செய்முறை:

வறுத்த ராகி மாவு, சர்க்கரைத்தூள், முந்திரி, ஏலக்காய்த்தூள் எல்லாவற்றையும் ஒன்று சேர்த்து, நெய்யை சூடாக்கி ஊற்றி உருண்டைகளாக பிடிக்கவும். முந்திரிக்கு பதிலாக வறுத்து உடைத்த வேர்க்கடலையையும் சேர்க்கலாம்.

[kanmani]

ராகி கார கொழுக்கட்டை

தேவையானவை:

ராகி மாவு - ஒரு கப், கடுகு - ஒரு டீஸ்பூன், உளுத்தம்பருப்பு - ஒரு டீஸ்பூன், துருவிய கேரட் - கால் கப், நறுக்கிய இஞ்சி - ஒரு டீஸ்பூன், நறுக்கிய பச்சைமிளகாய் - 2, கறிவேப்பிலை - சிறிதளவு, உப்பு - தேவையான அளவு, எண்ணெய் - 2 டீஸ்பூன்.

செய்முறை:

ராகி மாவை இளஞ்சூடாக வறுத்துக் கொள்ளவும். கடுகு, உளுத்தம்பருப்பு தாளித்து, கேரட், இஞ்சி, பச்சைமிளகாய், கறிவேப்பிலை போட்டு வதக்கவும். இதில் உப்பு போட்டு, வறுத்த மாவில் சேர்த்து வைக்கவும். தண்ணீரை கொதிக்க வைத்து, 2 டீஸ்பூன் எண்ணெய் ஊற்றி, மாவை கிளறவும். கொழுக்கட்டைகளாக பிடித்து துணி போட்ட இட்லி தட்டில் வேக வைக்கவும். ராகி மாவை வாசனை வரும்வரை வறுக்கத் தேவையில்லை. லேசாக வறுத்தாலே போதும். இப்படி வறுப்பது மாவின் கொழ கொழப்புத்தன்மையை போக்குவதற்குத்தான்!.

[kanmani]

ராகி இனிப்பு கொழுக்கட்டை

தேவையானவை: ராகி மாவு - 2 கப், வெல்லம் (அ) கருப்பட்டி - ஒரு கப், தேங்காய் - ஒரு மூடி, பயத்தம்பருப்பு - அரை கப், ஏலக்காய்த்தூள் - 2 டீஸ்பூன்.

செய்முறை:

பயத்தம்பருப்பை லேசாக வறுத்து நெத்துப்பதமாக (குழைய விடாமல், தொட்டால் உடைகிற பதம்) வேக வைத்துக் கொள்ளவும். ராகிமாவை இளஞ்சூடாக வறுத்து துருவிய தேங்காய், பயத்தம்பருப்பு, ஏலக்காய்த்தூள் சேர்த்து கலந்து வைக்க வும். வெல்லம் (அ) கருப்பட்டியை தண்ணீர் ஊற்றி கொதிக்க வைத்து வடிகட்டவும். அதை மீண்டும் கொதிக்க வைத்து மாவு கலவையில் ஊற்றி கொழுக்கட்டைகளாக பிடித்து, இட்லி தட்டில் துணி போட்டு வேக வைக்கவும்.

[kanmani]

ராகி வெஜ் அடை

தேவையானவை:

ராகி மாவு - ஒரு கப், மாவாக்கிய கோதுமை ரவை (அ) கோதுமை மாவு - ஒரு கப், பச்சரிசி மாவு (விருப்பப்பட்டால்) - கால் கப், காய்கறி கலவை - ஒரு கப் (துருவிய கேரட், வெங்காயம், கோஸ், முள்ளங்கி), சீரகத்தூள் - ஒரு டீஸ்பூன், மிளகுத்தூள் - அரை டீஸ்பூன், நறுக்கிய இஞ்சி, கறிவேப்பிலை - சிறிதளவு.

செய்முறை:

எல்லா பொருட் களையும் ஒன்று சேர்த்து வெது வெதுப்பான தண்ணீர் ஊற்றி பிசைந்து வைக்கவும். அரை மணி நேரம் கழித்து வாழை இலை (அ) பாலித்தீன் ஷீட்டில் எண்ணெய் தடவி கனமான அடைகளாகத் தட்டி தோசைக் கல்லில் சுட்டு எடுக்கவும்.

[kanmani]

ராகி முருங்கை அடை

தேவையானவை: ராகி மாவு - 2 கப், முருங்கை கீரை - அரை கப், பச்சரிசி மாவு - கால் கப், நறுக்கிய சின்ன வெங்காயம் - கால் கப், உப்பு - தேவையான அளவு. தாளிக்க - கடுகு, உளுத்தம்பருப்பு, கடலைப்பருப்பு - தலா ஒரு டீஸ்பூன், காய்ந்த மிளகாய் - 2.

செய்முறை: கடாயில் எண்ணெய் ஊற்றி, காய்ந்ததும் தாளிக்கும் பொருட்களைப் போட்டு தாளித்து, வெங்காயம், முருங்கை இலை சேர்த்து வதக்கவும். பத்து நிமிடம் வதங்கியதும், ராகி மாவு, அரிசி மாவில் கொட்டி இளஞ்சூடான தண்ணீரை ஊற்றிப் பிசைந்து, தோசைக் கல்லில் கனமான அடைகளாக தட்டவும்.

[kanmani]

ராகி புட்டு தேவையானவை:

வறுத்த ராகி மாவு - ஒரு கப், அச்சு வெல்லம் - அரை கப், துருவிய தேங்காய் - கால் கப், ஏலக்காய்த்தூள் - சிறிதளவு.

செய்முறை:

உப்பு கலந்த தண்ணீரை மாவில் சிறிது சிறிதாக தெளித்து புட்டுக்கு பிசைந்து கொள்ளவும். பதினைந்து நிமிடம் கழித்து மிக்ஸியில் போட்டு சுற்றவும் (அப்போதுதான் கட்டி இருக்காது). இந்த மாவை இட்லி தட்டில் துணி போட்டு பத்து நிமிடம் வேக வைக்கவும். வெந்த மாவில் துருவிய வெல்லம் அல்லது வெல்லப்பாகு (தேன் பதத்தில்), துருவிய தேங்காய், ஏலக்காய்த்தூள் கலந்து பரிமாறவும். வெல்லத்தைப் பாகாக செய்து சேர்த்தால் புட்டு தொண்டையை அடைக்காது.

[kanmani]

ராகி இடியாப்பம்

தேவையானவை: ராகி மாவு - 2 கப், நல்லெண்ணெய் - 2 டீஸ்பூன், தண்ணீர் - தேவையான அளவு.

செய்முறை: ராகி மாவை இட்லி தட்டில் துணி போட்டு வேக வைக்கவும். மாவில் தண்ணீர் தெளிக்க வேண்டாம். வெந்த மாவை ஆற வைக்கவும். தண்ணீரை கொதிக்க வைத்து 2 டீஸ்பூன் எண்ணெய் ஊற்றி, வெந்த ராகி மாவில் கொட்டி இடியாப்ப மாவு பதத்தில் கிளறவும். சூடாக இருக்கும்போதே இடியாப்பங்களாக பிழியவும். ஒன்றின் மேல் ஒன்று பிழியாமல் பரவலாக பிழிந்தால் கொழகொழப்பு இருக்காது. வெல்லம் சேர்ந்த தேங்காய்ப் பாலுடன் சாப்பிட சுவையாக இருக்கும். ராகி மாவுடன் அரிசி இடியாப்ப மாவை சம அளவு கலந்தும் செய்யலாம்

[kanmani]

ராகி சேவை

தேவையானவை: உதிர்த்த ராகி இடியாப்பம் - 2 கப், நறுக்கிய இஞ்சி, பச்சைமிளகாய் - 2 டீஸ்பூன், எலுமிச்சை சாறு - அரை கரண்டி, கறிவேப்பிலை - சிறிதளவு, எண்ணெய் - தேவையான அளவு. தாளிக்க: கடுகு, உளுத்தம்பருப்பு, பொட்டுக்கடலை - தலா ஒரு டீஸ்பூன்.

செய்முறை: கடாயில் எண்ணெய் ஊற்றி, தாளிக்கும் பொருட்களை போட்டு தாளிக்கவும். இஞ்சி, பச்சைமிளகாய், எலுமிச்சை சாறு, உப்பு, மஞ்சள்தூள் சேர்த்து, உதிர்த்த இடியாப்பத்தை போட்டுக் கிளறவும். கறிவேப்பிலை தூவி பரிமாறவும். -

[kanmani]

ராகி வற்றல்

தேவையானவை: ராகி மாவு - 2 கப், கல் உப்பு - தேவை யான அளவு, பச்சைமிளகாய் விழுது - சிறிதளவு, சீரகம் - ஒரு டீஸ்பூன்.

செய்முறை: தண்ணீரை நன்றாக கொதிக்க வைத்து, உப்பு, பச்சைமிளகாய் விழுது, சீரகம் சேர்க்கவும். இந்த தண்ணீரை ராகி மாவில் கொட்டி இடியாப்ப மாவு பதத்துக்கு கிளறி, ஓமப்பொடி அச்சில் போட்டு சிறு முறுக்குகளாக பிழியவும். வெயிலில் நன்கு உலர்த்தி, டப்பாவில் பத்திரப்படுத்தவும். தேவையானபோது எண்ணெயில் பொரித்து சாப்பிடலாம்

[kanmani]

ராகி பால் அல்வா

தேவையானவை: முழு கேழ்வரகு - கால் கிலோ, நெய் - கால் கிலோ, சர்க்கரை - அரை கிலோ, முந்திரி - 50 கிராம், ஏலக்காய்த்தூள், ஜாதிக்காய்த்தூள் - தேவையான அளவு.

செய்முறை: கேழ்வரகை முதல்நாள் இரவே ஊற வைக்கவும். மறுநாள் காலை கிரைண்டரில் அரைத்து 4 முறை பால் எடுக்கவும். இந்த கேழ்வரகு பாலை 4 மணி நேரம் வைத்திருந்தால் தெளிந்து விடும். மேலே நீர்த்திருக்கும் நீரை கொட்டி விடவும். கடாயில் சர்க்கரையை போட்டு தண்ணீர் ஊற்றி, ஜீரா பதத்தில் (சர்க்கரை தண்ணீரில் கரைந்ததும் ஏற் படும் பதம்) காய்ச்சவும். இதில் தெளிந்த கேழ்வரகு பால், நெய் ஊற்றி கிளறி அல்வா பதம் வந்ததும் ஏலக்காய்த் தூள், ஜாதிக்காய்த்தூள், முந்திரி தூவி இறக்கவும்.

[kanmani]

ராகி மாவு அல்வா

 தேவையானவை: ராகி மாவு, வெல்லம், தேங்காய்ப் பால் - தலா 2 கப், தண்ணீர் - ஒரு கப், நெய் - ஒரு கப், ஏலக்காய்த்தூள் - தேவையான அளவு.

செய்முறை: தேங்காய்ப் பாலில் தண்ணீர், வெல்லம், ராகி மாவு சேர்த்து கட்டியில்லாமல் கரைக்கவும். நெய் ஊற்றி அல்வா பதம் வரும் வரை கிளறவும். ஏலக்காய்த்தூள் சேர்த்து இறக்கவும். இந்த அல்வாவில் தேங்காய்ப் பால் சேர்த்திருப்பதால் 3 நாட்களுக்குள் பயன்படுத்திவிட வேண்டும்.

[kanmani]

ராகி ரெடிமேட் தோசை

தேவையானவை: ராகி மாவு - 2 கப், பச்சரிசி மாவு - ஒரு கப், நறுக்கிய பச்சைமிளகாய் - 2, நறுக்கிய இஞ்சி - ஒரு டீஸ்பூன், கறிவேப்பிலை - தேவையான அளவு, நறுக்கிய வெங்காயம் - 1, உப்பு - தேவையான அளவு.

செய்முறை: எல்லாவற்றையும் ஒன்றாக தண்ணீரில் கரைத்து ரவா தோசை போல் ஊற்றவும். ஊற வைக்க வேண்டியதில்லை. உடனே செய்யலாம்.

[kanmani]

ராகி ஸ்பான்ஜ் தோசை

தேவையானவை: ராகி மாவு - 2 கப், உளுந்து - அரை கப், வெந்தயம் - ஒரு டீஸ்பூன், உப்பு - தேவையான அளவு.

செய்முறை: உளுந்தையும் வெந்தயத்தையும் 3 மணி நேரம் ஊற வைத்து இட்லிக்கு அரைப்பது போல் அரைக்கவும். இதில் ராகி மாவு, உப்பு போட்டு கரைத்து மறுநாள் கனமான தோசைகளாக வார்க்கவும்.

[kanmani]

ராகி சப்பாத்தி

தேவையானவை: ராகி மாவு - ஒரு கப், கோதுமை மாவு - கால் கப், தண்ணீர் - 1 (அ) ஒண்ணேகால் கப், எண்ணெய் - 3 டீஸ்பூன், உப்பு - தேவையான அளவு.

செய்முறை: ஒரு பாத்திரத்தில் தண்ணீர் ஊற்றி கொதிக்க விடவும். தளதளவென கொதிக்கும்போது எண்ணெய், ராகி மாவு சேர்த்து கட்டியில்லாமல் ஐந்து நிமிடம் கிளறவும். பிறகு கோதுமை மாவை சேர்த்து ஆறியவுடன் மெல்லிய சப்பாத்திகளாக இட்டு, தோசைக் கல்லில் சுடவும். அடுப்பில் வைத்து கிளறாமல் சாதாரண சப்பாத்தி செய்யும் முறையிலும் எல்லாவற்-றையும் சேர்த்து, பிசைந்து செய்யலாம்.