எல்லா நாளும் வெறுங்கை பாத்து
வாழ்வில் வீசும் விரக்தி காத்து
தேர்தல் வந்தா காசை பாக்க
காத்திருப்பேன் கண்கள் பூத்து
ஊழல் லஞ்சம் என்றே புலம்பி
நானும் இருப்பேன் மனமும் வெதும்பி
கட்சி காரன் கண்டால் போதும்
களிப்புடன் மனசில் ஆசையும் அரும்பி
கஞ்சி போட்ட கரை வேட்டி கட்டி
கொஞ்சம் மிடுக்கா நடை ஒன்னு போட்டு
வீதி வருதே சாமின்னு சொல்லி
நானும் நிப்பேன் ஆரத்தி காட்டி
ஓட்டு போட உரிமையும் கொடுத்த
தேர்தல் கமிஷன் பேரிலும் கமிஷன்
இருப்பதாலே என் ஒட்டு போட
காச தானே கமிஷனா கேட்டேன்
பழைய சோறுக்கு வக்கத்து போயி
நிக்குறப்போ பக்கத்தில் வந்து
பிரியாணி பொட்டலமும் தந்தா
வாங்கி தின்ன மாட்டேனா நானும்?
கெட்டு போன அரிசியா கூட
இலவசமா தந்தால் போதும்
பல்ல இளிச்சி நானும் போய்
வாங்கத்தான் வரிசையில் நிப்பேன்
கொஞ்சமாக காசையும் கண்ணில்
காட்டினலே இப்போது போதும்
ஒட்டு கேட்டு பின்னாடி தானே
கொடிய தூக்கி நானும் நடப்பேன்
கட்சிக்கெல்லாம் கொள்கைகள் உண்டாம்
அப்படின்னா என்னனு கேப்பேன்
காசுக்காக கட்சியில இருக்கும்
எனக்கும்.இங்கே கொள்கைகள் எதுக்கு
மதுவை கொஞ்சம் தந்தால் போதும்
மனசு எல்லாம் சந்தோசம் பொங்க
எதிர்காலம் என்ன ஆனால் என்று
இன்று நானும் என் வாக்கை தருவேன்
இப்படித்தான் என் வாக்க இங்கே
காசுக்காக நானும் தான் வித்தேன்
தேர்தல் முடிந்த பின்னாடி நானும்
அவர்கள் போடும் சட்டத்தால் செத்தேன்
