~ ரவா டோக்ளா ~

[MysteRy]

ரவா டோக்ளா



தேவையான பொருட்கள்:

ரவை – ஒரு கப்
தயிர் – கால் கப்
உப்பு – சிறிதளவு
பச்சை மிளகாய் – 2
ஈனோ ஃப்ருட் சால்ட் (ரெகுலர்) – சிறிய சாஷே ஒன்று
மக்கா சோளம் – அரை கப்
பாசிப்பயறு – அரை கப்
தேங்காய்ப் பூ – அரை கப்
மிளகாய்ப் பொடி – கால் தேக்கரண்டி
மிளகுப் பொடி – கால் தேக்கரண்டி
நெய் – 2 தேக்கரண்டி

செய்முறை:

• பாசிப்பயறு, சோளம் இரண்டையும் ஊற வைத்து, வேக வைத்து, எடுத்து வைக்கவும். தேங்காய்ப் பூவை வாசம் வரும் வரை வறுத்து எடுத்து வைக்கவும்.

• ரவையில் தயிரும் உப்பும் கலந்து, அரை மணி நேரம் ஊற வைக்கவும். இத்துடன் சிறு துண்டுகளாக நறுக்கிய பச்சை மிளகாயையும் போட்டு, கலக்கவும்.

• ஒரு கிண்ணம் அல்லது தட்டில் நெய் தடவி, தயாராக வைக்கவும்.

• இந்தக் கலவையில் ஈனோ சால்ட் போட்டு, நன்றாக கலக்கவும். குக்கரில் தண்ணீர் ஊற்றி, கொதிக்க விட்டு, தயாராக வைக்கவும். நெய் தடவிய பாத்திரத்தில், இந்தக் கலவையை ஊற்றவும். அதன் மேல், மிளகாய்ப் பொடி, மிளகுப் பொடி இரண்டையும் பரவலாக, தூவி விடவும்.

• வெந்த சோளம், பாசிப் பயறு இவற்றில் ஒவ்வொரு தேக்கரண்டி எடுத்து, இந்த கலவையின் மீது, பரவலாகத் தூவவும்.

• குக்கருக்குள் இந்தப் பாத்திரத்தை வைக்கவும். கலவையில் தண்ணீர் பட்டு விடாமல், அடியில் இன்னொரு பாத்திரத்தை வைத்து, அதன் மேல் இந்தக் கலவை இருக்கும் தட்டை வைக்கவும். குக்கரில் வெயிட் போட வேண்டாம். ஒரு தம்ளரை வைத்து, குக்கரின் மேல் வெயிட் போடும் இடத்தில், மூடி வைக்கவும். 15 - 20 நிமிடங்கள் ஆனதும் அடுப்பை அணைக்கவும்

• பாத்திரத்தை வெளியில் எடுத்து, ஓரங்களில் சிறிய கரண்டி அல்லது கத்தியால் நெகிழ்த்தி விட்டு, இன்னொரு தட்டில் எடுத்து வைக்கவும்.

• மீதமுள்ள சோளம், பாசிப் பயறை இதன் மேல் தூவவும். வறுத்த தேங்காய்ப்பூவையும் தூவி, அலங்கரிக்கவும். சிறிய துண்டுகளாக, விருப்பப்பட்ட வடிவத்தில் கட் செய்து, பரிமாறவும்.