Posted by: Kavii
« on: October 03, 2024, 02:19:06 PM »கொலுசு கவிதை !
குழந்தையின் கொலுசு சத்தம் அம்மாவுக்கு:-
தன் குழந்தையின் கொலுசு சத்தம் கேட்டு
ஓடிடும் அவளது பார்வை!
தூக்கத்திலிருந்து தான் குழந்தை விழித்து விட்டது
என்பதை காட்டி கொடுக்கும் மணியோசை !
குழந்தை அதன் பட்டு பாதம் அடியெடுத்து வைத்து
துறு துறு என அங்கும் இங்கும் ஓடி திரியும்போது
எங்கே நீ என் மழலை! என அவள் தவிக்கும்போது
அதன் கொலுசு ஒலி அம்மாவுக்குத் திசை காட்டும் கருவி !
குழந்தையின் சிரிப்புடன் ஓடிவரும் கொலுசு இசை!
ரீங்காரமாய் அவள் மனதை கவரும் மெல்லிசை!
அப்பாவுக்கு – குழந்தையின் கொலுசு சத்தம் !
கொலுசு அணிந்த தான் பிஞ்சு காலால்
தன் தந்தையின் மார்பை எட்டி உதைக்கயிலே
உலகமே தன் கையில் வந்தது போல ஒரு இன்பம் அவருக்கு!
அவள் தத்தி நடக்கையிலே ! கண்களை உருட்டி சிரிக்கயிலே ! எல்லையில்லா பேரானந்தம் அவருக்கு!
உலகில் உள்ள எல்லா இசையும் தோற்று போகும் முத்து கொலுசு அணிந்த அவரது மகளின் பிஞ்சு பாத நடையின் ஓசையிலே !
அம்மாவின் கொலுசு சத்தம் - குழந்தைக்கு !
தன் தாயின் கருவறையில் இருக்கும்போதே பழக்கப்பட்ட ஒன்று !
தன் அருகில் தான் இருக்கிறாள் தன் தாய் என்று
நம்பிக்கை தரும் சத்தம் தன் தாயின் கொலுசு சத்தம் !
காதலனுக்கு - காதலியின் கொலுசு சத்தம்!
அவள் வருகையை முன்பே சொல்லிவிடும் சுற்றறிக்கை!
மருதாணியிட்ட காலின் அழகோடு கொலுசின்
அழகும் சேர்ந்து கொள்ள கொலுசால் கால் அழகா !
அவள் காலால் அந்த கொலுசிற்கு அழகா !
என்று ஐயம் எழுகிறது !
அவள் அழகாய் எடுத்து வைக்கும் ஒவ்வொரு அடியும்
என் காதில் சிம்பொனிகளாய் ஒலிக்க !
அதன் அதிர்வுகள் என் நெஞ்சில் முத்தமிட்டு என் காதலை
தட்டி எழுப்பி உன்னருகே எனை ஈர்க்கிறது !
வெட்கத்தில் அவள் போடும் கோலங்களுக்கு
நீயும் மௌனமாய் ஒத்துழைக்கிறாய் !
நீ அவளது பாதம் தொட்டதால் !
நான் கூட இன்று கவிஞனாகிவிட்டேன்!
மனைவியின் கொலுசு சத்தம் – கணவனுக்கு :
அவளின் கொலுசு சத்தம் அவன் காதில் காதலை ஊற்றுகிறது!,
சிணுங்கும் அவளது கொலுசு ஒலியில் காதலை இணைக்க,
ஒவ்வொரு சாதங்கையும்சதங்கையும் காதல் இசை பாட !
அவள் மடியில் அவன் வீழ்ந்திடும் நேரம்!
அவள் கொலுசின் இசைதான் அவர்கள் வாழ்க்கை சேர்க்கும் மணியாரம் !
அலை பேசி தேவை இல்லை அவனை அழைக்க !
அவள் கொலுசு சத்தம் போதும் !
கொடுத்து வைத்த கொலுசுகள் ! அவனை விட அதிக நேரம்
அவைகள் தானே உறவாடுகிறது அவளோடு !
கொலுசு !
கல்லீரல் ! மண்ணீரல் ! பித்தப்பை, கருப்பை போன்ற முக்கிய உறுப்புகளின் திறனை தூண்டிவிடும் சக்தியும் இந்த கொலுசிற்கு உண்டாம்!
அப்பப்பா ! எத்தனை சிறப்புகள் இந்த வெள்ளி கொலுசுக்கு!
